UN GLOBAL COMPACT ÍSLAND

COP31 hafin í Antalya og framkvæmdin er í forgrunni Loftslagsráðstefna Sameinuðu þjóðanna, COP31, hófst í dag í Antalya í Tyrklandi og stendur til 20. nóvember. Ráðstefnan hefur verið kölluð "framkvæmda-COP", því nú snýst umræðan síður um ný loforð og meira um að standa við þau sem þegar hafa verið gefin. „Við erum gengin inn í nýtt tímabil öfga í veðurfari,“ segir António Guterres, aðalframkvæmdastjóri Sameinuðu þjóðanna, í tilefni af nýrri skýrslu Alþjóðaveðurfræðistofnunarinnar (WMO) um stöðu loftslagsmála. Samkvæmt skýrslunni stefnir árið 2026 í að verða eitt af fjórum hlýjustu árum frá upphafi mælinga. Meðalhiti við yfirborð jarðar var fyrstu níu mánuði ársins um 1,47 °C yfir meðaltali áranna 1850–1900. Þessi þróun er þegar farin að snerta rekstur fyrirtækja, til dæmis þegar öfgaveður raskar flutningum, skemmir innviði eða truflar framboð hráefna. Mörg þeirra eru farin að aðlaga reksturinn og byggja þannig upp viðnámsþrótt til framtíðar. Hvert brot úr gráðu skiptir máli COP31 er fyrsta loftslagsráðstefnan frá því að Umhverfisstofnun Sameinuðu þjóðanna (UNEP) komst að þeirri niðurstöðu að ekki verði lengur komist hjá því að fara yfir 1,5 °C. Það dregur ekki úr mikilvægi markmiðsins, heldur eykur það þörfina á að halda hlýnuninni eins lítilli og skammvinnri og hægt er. Hlutverk fyrirtækja í framkvæmdinni Stjórnvöld marka stefnuna, en fyrirtæki byggja innviði, innleiða tækni, fjárfesta og umbreyta virðiskeðjum. Á vettvangi UN Global Compact í New York í september nefndu stjórnendur fyrirtækja innviði, óstöðuga stefnumótun og fjármagnskostnað sem helstu hindranirnar í vegi hraðari orkuskipta. Fyrirtæki kalla því eftir fyrirsjáanlegri stefnu og hraðari leyfisveitingum, en á móti er ætlast til þess að þau setji sér trúverðug markmið og gagnsæjar aðgerðaáætlanir. Rafvæðing, fjármagn og réttlát umskipti Meðal þess sem rætt er á ráðstefnunni er tillaga um að hækka hlut rafmagns í orkunotkun heimsins úr um 20 prósentum í 35 prósent fyrir árið 2035. Slík breyting skilar þó aðeins árangri ef rafmagnið kemur frá hreinum orkugjöfum og fjárfest er í flutningskerfum, geymslu og orkunýtni. Fjármagn þarf einnig að ná þangað sem þörfin er mest, en stefnt er að því að virkja 1.300 milljarða Bandaríkjadala árlega til þróunarríkja fyrir árið 2035. Umskiptin verða jafnframt að vera réttlát, með góðum störfum, nýrri færni og raunverulegri aðkomu starfsfólks og samfélaga. Dagskrá UN Global Compact United Nations Global Compact, ásamt landsnetum um allan heim, stendur fyrir fjölbreyttri dagskrá á COP31. Þar er sjónum beint að hlutverki fyrirtækja í umskiptunum yfir í kolefnislaust, réttlátt og loftslagsþolið hagkerfi. Kynntu þér dagskrána Samantekt að ráðstefnu lokinni Hvað þýða niðurstöður COP31 fyrir fyrirtæki? Við vekjum athygli á veffundi 2. desember nk. kl. 16 að íslenskum tíma, þar sem farið verður yfir það helsta. Fundurinn verður einnig aðgengilegur í UN Global Compact Academy. Skráðu þig hér Fréttatilkynning WMO | Um COP31

Hvernig verða sjálfbærnimarkmið að mælanlegum árangri? Dagsetning: Þriðjudagurinn 24. nóvember. Tími: Kl. 10:00 að íslenskum tíma.

Hvar stendur þitt fyrirtæki þegar kemur að mannréttindum í virðiskeðjunni? Dagsetning: Mánudagurinn 2. nóvember. Tími: Kl. 11:00 að íslenskum tíma.

Kauphegðun og ákvarðanir fyrirtækja hafa bein áhrif á vinnuaðstæður, mannréttindi og umhverfi í öllu virðiskeðjunni. Þrátt fyrir það er hlutverk innkaupa oft vanmetið þegar kemur að áreiðanleikakönnunum (HRDD). Þessi vefstofa er sú önnur í röðinni af þremur um ábyrg innkaup og er unnin í samstarfi við Responsible Contracting Project (RCP). Sjónum verður beint að hagnýtri innleiðingu ábyrgra innkaupaferla, hvernig megi endurskoða núverandi vinnulag og hvaða aðferðir skila raunverulegum árangri. Fjallað verður um raundæmi úr textíl-, landbúnaðar-, flutninga- og bílaiðnaði. Helstu spurningar sem svarað verður: Hvað einkennir óábyrga innkaupahætti? Hvaða grunnkröfur um ábyrg innkaup ættu fyrirtæki að innleiða þvert á allar vörur og þjónustu? Hvaða áhættumiðaðar innkaupaaðferðir þarf að beita í áhættugreinum? Hvaða raundæmi og lausnir nýtast best í starfi? Fyrir hverja: Vefstofan er ætluð innkaupastjórum, sérfræðingum í sjálfbærum innkaupum og þeim sem bera ábyrgð á mannréttinda- og umhverfisáreiðanleikakönnunum (HREDD). Hagnýtar upplýsingar Dagsetning: Miðvikudagurinn 11. nóvember Tími: K l. 09:00–11.00 að íslenskum tíma . Fyrirlesari: Daniel Schönfelder, lögfræðilegur ráðgjafi hjá RCP Þeir sem komast ekki geta skráð sig og fengið upptöku senda að námskeiði loknu. Skráning

Önnur lota námskeiðaraðarinnar Sustainability TrendsWatch 2026 fer fram þriðjudaginn 24. nóvember á vegum UN Global Compact Academy. Lotan ber yfirskriftina The Clean Energy Advantage: How a Just Transition Can Ensure Business Resilience. Í námskeiðaröðinni er farið yfir nýjustu strauma og horfur í sjálfbærni atvinnulífsins, tækifæri og það sem stjórnendur þurfa að hafa að leiðarljósi til að vaxa og hafa áhrif. Í þessari lotu er sjónum beint að orkuskiptunum: hvað drífur þau áfram, hvað hindrar útbreiðslu hreinnar orku og hvernig fyrirtæki geta nýtt fjárfestingar, kaupmátt og samtakamátt til að auka hlut endurnýjanlegrar orku og skapa verðmæti til lengri tíma. Hagnýtar upplýsingar Dagsetning: Þriðjudagurinn 24. nóvember Tími: Kl. 14:00–15:00 að íslenskum tíma. Tungumál: Enska, með þýðingu á spænsku, portúgölsku og frönsku. Þeir sem komast ekki geta skráð sig og fengið upptöku senda að námskeiði loknu. Skráning