UN Global Compact  Ísland

Eitt markmiða í stefnu UN Global Compact er að fjölga löndum með staðbundna starfsemi (e. Country Networks). 

Í lok árs 2022 var ákveðið að ráða svæðisstjóra UN Global Compact á Íslandi með áformum um að auka áhrif framtaksins á Íslandi. Vorið 2023 tók ráðgjafaráð (e. Leadership Council) UN Global Compact á Íslandi til starfa. Hlutverk ráðgjafaráðsins var að styðja við starfsemina og undirbúa stofnun félagsins á Íslandi. Þann 22. janúar 2025 var félagið, UN Global Compact Ísland formlega stofnað. 

UN Global Compact Ísland er sjálfstætt starfandi staðarnet (e. Country Network) innan United Nations Global Compact og starfar í nánu samstarfi við Global Compact Office (GCO) í New York samkvæmt árlegum samstarfssamningi (Annual Agreement). Stjórnskipulag félagsins byggir á lögum og samþykktum félagsins þar sem stjórn félagsins ber ábyrgð á stefnumótun og framkvæmd starfsemi í samræmi við gæðakröfur UNGC Country Network. 

Tilgangur félagsins er að stuðla að ábyrgum viðskiptaháttum og sjálfbærni íslensks atvinnulífs á grunni tíu meginreglna UNGC og heimsmarkmiða Sameinuðu þjóðanna um sjálfbæra þróun. 

Markmið félagsins er að auka vitund, skilning og þekkingu á sjálfbærni og mikilvægi hennar fyrir íslenskt atvinnulíf og samfélag, að stuðla að samvinnu og samtali milli atvinnulífs, hins opinbera, menntastofnana og almennings um framgang sjálfbærar þróunar, og styðja þátttakendur við að innleiða sjálfbæra stefnu og starfshætti í samræmi við meginreglur UN Global Compact og heimsmarkmið Sameinuðu þjóðanna um sjálfbæra þróun.