Áramótakveðja 2025

Á árinu 2025 lögðum við ríka áherslu á fræðslu, virkni og norrænt samstarf enda festir sjálfbærni sig aðeins í sessi innan fyrirtækja þegar allt starfsfólk hefur tækifæri til að taka þátt og hún verður hluti af daglegum ákvörðunum og menningu fyrirtækja. Stjórn félagsins hefur allt árið unnið afar öflugt og metnaðarfullt starf og við erum rétt að byrja. Við færum öllum þátttakendum okkar og samstarfsaðilum einlægar þakkir fyrir virka þátttöku, áhuga og samtöl á árinu.

Árið hófst af krafti í janúar með vel sóttum stofnfundi félagsins þar sem fyrsta stjórn samtakanna var kjörin. Við tókum einnig þátt í vel heppnuðum hliðarviðburði í tengslum við janúarráðstefnu Festu þar sem mannréttindi í virðiskeðjum voru í brennidepli og fjallað var um stöðuna út frá ólíkum sjónarhornum. Við höfðum einnig ánægju af því að taka á móti samstarfsfólki okkar frá UN Global Compact Network Nepal sem heimsótti Ísland og vakti athygli á ábyrgð fyrirtækja og neytenda í aðfangakeðjum. Þá barst öflugur stuðningur á skrifstofuna þegar við fengum til okkar starfsnema í byrjun ársins.

Í febrúar hófst Viðskipta- og mannréttindahraðallinn þar sem íslensk fyrirtæki unnu markvisst að því að greina áhættu, efla þekkingu og móta raunhæfar aðgerðaáætlanir í þágu mannréttinda. Hópurinn hittist reglulega næstu mánuði í staðlotum þar sem gestafyrirlesarar og sérfræðingar miðluðu reynslu og þátttakendur unnu þétt saman.

Marsmánuður var, líkt og fyrri ár, helgaður jafnrétti og fræðslu. Við tókum þátt í að hringja inn kauphallarbjöllunni í þágu jafnréttis í samstarfi við Nasdaq, UN Women á Íslandi og FKA. Jafnframt var sjónum beint að norrænu samstarfi með kynningu á Nordic Nature Starter Pack, nýju verkefni sem styður fyrirtæki í fyrstu skrefum í stefnumótandi vinnu á sviði náttúruverndar auk þess sem ný og uppfærð rafræn akademía UN Global Compact var kynnt til leiks.

Í apríl tókum við þátt í One Global Compact Forum í Cape Town þar sem rætt var um nýja stefnu samtakanna og mikilvægi þess að halda fókus á kjarnaábyrgð, mannréttindi og sjálfbærni á tímum þar sem sjálfbærni mætir vaxandi áskorunum. Styrkleiki UN Global Compact liggur í skýrum grunngildum sáttmálans þegar heimurinn tekur breytingum og gildum er ögrað.

Í maí stóðum við fyrir opnum morgunfundi í samstarfi við Nordic Sustainability þar sem sjónum var beint að sjálfbærni, regluverki ESB og stöðunni á Íslandi í kjölfar Omnibus-tillögunnar. Umræðurnar undirstrikuðu að sjálfbærni snýst ekki eingöngu um að uppfylla kröfur heldur um forystu, gildi og hugrekki til að hefja vegferðina. Sjálfbærnivinna er langtímaverkefni sem byggir á forgangsröðun og virkri þátttöku innan fyrirtækja.

Í júní fór fram Nordic Meeting 2025 í Helsinki þar sem yfir 200 þátttakendur frá norrænum fyrirtækjum komu saman. Þar var íslenska félagið formlega boðið velkomið í norrænt samstarf. Réttlát umbreyting, áreiðanleikakönnun, haghafar og samþætting sjálfbærni í daglegan rekstur voru meðal lykilþema fundarins. Fundurinn staðfesti mikilvægi þess að læra hvert af öðru og vinna saman þvert á landamæri.

Ágúst og september einkenndust af áherslu á loftslagsaðgerðir, jafnræði og mannréttindi. Ný fræðsluverkefni stóðu þátttakendum til boða, þar á meðal SBTi Starter Pack og Nordic Programme on Non-Discrimination og var ánægjulegt að sjá áhuga íslenskra fyrirtækja. Þá lauk einnig Viðskipta- og mannréttindahraðlinum og hafa þátttökufyrirtækin nú byggt upp skýrar og metnaðarfullar aðgerðaáætlanir sem styðja við raunverulegar umbætur í þágu mannréttinda. 

Í október fengu þátttakendur tækifæri til að taka þátt í Nordic Integrity Talks, viðburðaröð sem fjallar um hvernig sporna megi gegn spillingu í alþjóðlegu og áhættusömu viðskiptaumhverfi. Þrátt fyrir lága spillingu á Norðurlöndum er þetta samtal mikilvægt, ekki síst í samhengi við ábyrgð fyrirtækja sem starfa á alþjóðlegum mörkuðum og mikilvægi þekkingar, forvarna og samvinnu.

Árið náði ákveðnum hápunkti í nóvember þegar við héldum viðburð í Hvalasafninu og fögnuðum 25 ára afmæli samtakanna og formlegri stofnun félagsins. Þar fengum við til okkar frábæra gestafyrirlesara þau Andreas Rasche og Stine Lise Hattestad Bratsberg, auk öflugra leiðtoga úr íslensku atvinnulífi sem deildu sinni sýn á sjálfbærnimál fyrirtækja á Íslandi. Viðburðurinn var fyrst og fremst vettvangur til samveru og samtals þar umræðan fór um víðan völl m.a. leiðtogahlutverk fyrirtækja í óstöðugum heimi, mikilvægi gilda, jafnvægi milli hagnaðar og ábyrgðar og hvernig sjálfbærni, nýsköpun og tækni geta skapað bæði tækifæri og aukna seiglu til framtíðar.

Í desember höfum við haldið áfram að styrkja grunn og innviði félagsins með það að markmiði að styðja við áframhaldandi vöxt, faglegt starf og öfluga þjónustu við þátttakendur á nýju ári. 

Árið 2025 var bæði viðburðaríkt og markaði stór tímamót í starfsemi United Nations Global Compact á Íslandi. Hæst ber að nefna að það eru 25 ár síðan sáttmáli Sameinuðu þjóðanna, Global Compact, um ábyrga viðskiptahætti varð til. Sáttmálinn, sem byggir á tíu meginmarkmiðum, hafði það að markmiði að virkja fyrirtæki um allan heim til að taka þátt í lausn alþjóðlegra áskorana í þágu betri heims. Með Global Compact varð til sameiginlegur rammi fyrir fyrirtæki til að samræma stefnu og starfsemi við alþjóðleg viðmið og gildi Sameinuðu þjóðanna. Í síbreytilegum heimi má segja að meginmarkmið sáttmálans séu kjarni sjálfbærni eins og við þekkjum hugtakið í dag. Þau standast tímans tönn og eru gildi sem fyrirtæki, óháð stærð eða starfsemi, geta tengt við.

Íslensk fyrirtæki hafa tekið þátt í Global Compact allt frá árinu 2006 og á þeim grunni hefur myndast öflugur hópur sem hefur kallað eftir auknu samstarfi, sameiginlegum vettvangi fyrir fræðslu og umræðu og sterkari tengingu við alþjóðlegt starf samtakanna. Stofnun íslenska félagsins er því eðlilegt framhald þessarar þróunar og staðfestir metnað íslensks atvinnulífs til að vera virkur þátttakandi í ábyrgum og sjálfbærum viðskiptum. Í dag hefur íslenska félagið fest sig í sessi sem vettvangur þar sem áhuginn heldur áfram að aukast, þátttakendum fjölgar og sífellt fleiri fyrirtæki vilja efla þekkingu sína og innleiða ábyrg vinnubrögð í sameiginlegu samtali.

Kæru þátttakendur og samstarfsaðilar, gleðilegt og farsælt nýtt ár. Við hlökkum til áframhaldandi samstarfs árið 2026!